បាត់ខ្លួនវិស្វករ ៧ឆ្នាំ បែរប្រទះឃើញក្នុងរថយន្តបាត​ទន្លេគួរឲ្យភ្ញាក់ផ្អើល

ជា​រឿង​គួរ​ឲ្យ​ភ្ញាក់ផ្អើល ​និង​មិន​នឹក​ស្មាន​មួយ​ដែល​គេ​រក​ឃើញ​សាកសព​សល់​តែ​គ្រោង​ឆ្អឹង​បុរស​ម្នាក់​នៅ​ក្នុង​រថយន្ត​លិច​ទឹក​កប់​ភក់​នៅ​ស្រុក​មួង ​ដោយ​គេ​សន្និដ្ឋាន​ថា ​ជា​វិស្វករ​ដែល​បាន​បាត់​ខ្លួន​កាល​ពី ៧​ឆ្នាំ​មុន។

ជន​រងគ្រោះ​មាន​ឈ្មោះ រើងរឹទ្ធ ចិត្តធម៌ ​អាយុ ៣២​ឆ្នាំ ​រស់​នៅខេត្ត​ខុនគែន ​បាត់​ខ្លួន​ក្នុង​ឆ្នាំ ២០១១។ ​អត្តពលិក​កីឡា​ទ្រីយ៉ាត្លុង (​រត់+ហែលទឹក+ជិះកង់) ​ដែល​កំពុង​រៀន​ហែល​ទឹក​នៅ​វាល​ណងណាមខោវ តំបន់​ថា​ឆាង ​ជា​អ្នក​ប្រទះ​ឃើញ​រថយន្ត​លិច​ទឹក​ដំបូង​គេ ​ទើប​រាយ​ការណ៍​​ជូន​សមត្ថកិច្ច​បង្ក​ការ​ភ្ញាក់ផ្អើល។ ​អាជ្ញាធរ​បាន​រក​ឃើញ​គ្រោង​​​ឆ្អឹង ​ដប​ថ្នាំ​សម្លាប់​សត្វ​ល្អិត ​គ្រឿង​អលង្ការ​មាន​តម្លៃ ​និង​អត្តសញ្ញាណប័ណ្ណ​នៅ​ក្នុង​រថយន្ត។

​​វរសេនីយ៍ឯក​លោក​ ស្រ៊ីចាន់ ​ជា​អនុប្រធាន​ស៊ើបអង្កេត​ប្រចាំ​ប៉ុស្ដិ៍​​ប៉ូលិស​ស្រុក​មួង ខេត្ត​ចាន់បុរី ​បាន​អះអាង​កាល​ពី​ថ្ងៃ​ព្រហស្បតិ៍​ថា ​តាម​រយៈ​ការ​ត្រួតពិនិត្យ​ស្លាក​លេខ​ឡាន​បង្ហាញ​ថា ​ម្ចាស់​រថយន្ត​​ពិត​ប្រាកដ​អាយុ ​៣៥​ឆ្នាំ ​ជា​របស់​សាស្ត្រាចារ្យ​សាកល​វិទ្យាល័យ​មួយ​​រស់​នៅ​ខេត្ត​ភាគ​ខាង​ត្បូង​ប្រទេស​។

ស្ត្រី​ម្នាក់​បាន​ចេញ​មុខ​អះអាង​ទាំង​ទឹក​ភ្នែក​​ថា ​ឆ្អឹង​ទាំង​នោះ​ជា​របស់​មិត្តប្រុស​របស់​នាង​ឈ្មោះ​រើងរឹទ្ធ ​ដែល​បាន​បាត់​ខ្លួន​កាល​​ពី ៧​ឆ្នាំ​មុន។ ​គ្រួសារ​សាច់​ញាតិ​ជន​រងគ្រោះ​បាន​ដាក់​ពាក្យ​បណ្ដឹង​ចំពោះ​ការ​បាត់​ខ្លួន​ទៅ​កាន់​ប៉ូលិស​ក្នុង​ឆ្នាំ ២០១១ ​រួច​ហើយ​ដែរ តែ​​គ្មាន​ដំណឹង​សោះ​។ យោង​តាម​ប្រភព​ដដែល​បន្ត​ថា​ អំឡុង​ពេល​បាត់​ខ្លួន រើងរិទ្ធ ​ធ្វើ​ការ​ជា​វិស្វករ​ក្នុង​រោងចក្រ​ក្រដាស​មួយកន្លែង​​ក្នុង​ខេត្ត​ប្រាឈីនបុរី ​ហើយ​មុន​ពេល​បាត់​ខ្លួន ​គាត់​បាន​ទៅ​លេង​នាង​នៅ​សកលវិទ្យាល័យ​ក្នុង​ខេត្ត​ចន្ទបុរី។

ពេល​នោះ ​នាង​កំពុង​សិក្សា​ថ្នាក់​អនុបណ្ឌិត ​ពេល​ចេញពី​រៀន​ព្រឹក​​​​ នាង​ក៏​បាន​ឲ្យ​មិត្ត​ប្រុស​ជូន​ទៅ​ផ្ទះ​វិញ។ អំឡុង​ពេល​ជជែក​គ្នា​លេង​តាម​ផ្លូវ​ ​គាត់​បាន​ប្រាប់​នាង​ថា ​គាត់​ធុញថប់​តប់ប្រមល់​​ខ្លាំង​ណាស់​ដោយ​សារ​ការងារ និង​រឿង​គ្រួសារ។ ​នាង​បាន​និយាយ​ផ្ដល់​កម្លាំង​ចិត្ត ​កុំ​ឲ្យ​គិត​ច្រើន​ពេក ​និង​ប្រាប់​គាត់​ឲ្យ​ទៅ​យក​នាង​នៅ​ម៉ោង ​៨​យប់​ក្រោយ​រៀន​ចប់​នៅ​ថ្ងៃ​ដដែល។ ​ប៉ុន្តែ​នៅ​យប់​នោះ គាត់​មិន​បាន​មក​យក និង​មិន​អាច​ទាក់ទង​តាំង​ពីពេល​នោះ​មក​រហូត​។ ការ​ស៊ើបអង្កេត​បឋម​រក​ឃើញ​ថា ​គាត់​ទំនង​ជា​ធ្វើ​អត្តឃាត​​បើក​ចូល​ទន្លេ​ ដោយ​​យោង​ទៅ​តាម​វត្ថុ​តាង​បន្សល់​ទុក​ក្នុង​រថយន្ត ​ហើយ​ពេល​នេះ​ប៉ូលិស​កំពុង​ស៊ើប​បន្ត​ទៀត៕ (ប្រែ​សម្រួល៖ Morning Fresh)

ហាមលួចចម្លងអត្ថបទ​ពីវេបសាយ Morningfresh.news ដោយគ្មានការអនុញ្ញាត
error: ហាម​លួចចម្លង​អត្ថបទ​នេះ!