រក​ឃើញ​មឈូស​ថ្ម​អាថ៌​កំបាំង​មួយ សង្ស័យ​មាន​សព​របស់​អធិរាជ​ជាង ២ពាន់​ឆ្នាំ​មុន បុរាណ​វិទូ​នឹង​បើក​ឆាប់ៗ​នេះ

ក្រុម​បុរាណ​វិទូ​របស់​ប្រទេស​អេហ្សីប បាន​ប្រទះ​ឃើញ​មឈូស​ថ្ម​ដ៏​អាថ៌កំបាំង​មួយ កប់​ជ្រៅ​នៅ​ក្រុង  Alexandria ដែល​គេ​ជឿ​ថា​ជា​កន្លែង​បញ្ចុះ​សព​របស់​អធិរាជ​ពូកែ​ចម្បាំង និង​ជា​មហាសេដ្ឋី​សម័យ​បុរាណ Alexander the Great។ ក្រុម​អ្នក​សិក្សា​ស្រាវជ្រាវ កំពុង​​សិក្សា​លម្អិត​ដោយ​យក​ចិត្ត​ទុក​ដាក់ ព្រម​ទាំង​សម្រេច​ចិត្ត​ថា​នឹង​បើក​មឈូស​មួយ​នេះ​ក្នុង​ពេល​ឆាប់ៗ​ខាង​មុខ ដើម្បី​បក​ស្រាយ​អាថ៌កំបាំង​មួយ​នេះ។

​​​បើ​តាម​សារព័ត៌មាន Daily Mail របស់​ចក្រភព​​អង់គ្លេស បាន​ឲ្យ​ដឹង​ថា មឈូស​ថ្ម​នោះ មាន​ប្រវែង ១០ហ្វីត(ប្រហែល ៣​ម៉ែត្រ) និង​កម្ពស់ ៦,៥​ហ្វីត(ប្រហែល ១,៩៥ម៉ែត្រ)។ មឈូស​ថ្ម​នេះ បាន​កប់​​ក្រោម​ផ្នូរ​មួយ​កន្លែង​នៃ​ក្រុង Alexandria ដែល​ជា​ក្រុង​ដ៏​ចំណាស់​មួយ កសាង​ឡើង​ដោយ​អធិរាជ Alexander the Great។ នៅ​ក្នុង​ផ្នូរ​នោះ ក៏​មាន​បន្សល់​ទុក​រូប​សំណាក​ក្បាល​មួយ ឆ្លាក់​ពី​ថ្ម​ស ស្រដៀង​ទៅ​នឹង​អធិរាជ Alexander the Great។

បើ​តាម​ក្រុម​បុរាណ​វិទូ ដែល​ប្រទះ​ឃើញ​ផ្នូរ​នោះ បាន​សន្និដ្ឋាន​ថា ជា​របស់​ព្រះ​ចៅ​អធិរាជ​ណា​មួយ ហើយ​ក្នុង​មឈូស​ថ្ម​នោះ ដាក់​សព​របស់​មហាសេដ្ឋី​សម័យ​បុរាណ។ ទោះ​បែប​នេះ​ក្ដី ក្រុម​អ្នក​ស្រាវជ្រាវ មិន​ទាន់​អាច​បើក​មឈូស​នោះ​ភ្លាម​ៗ​ទេ ដោយ​រង់​ចាំ​ការ​សិក្សា​ឲ្យ​បាន​ច្បាស់​លាស់​​​សិន ចៀសវាង​ប៉ះ​ពាល់​ដល់​សណ្ឋាន​ខាង​ក្នុង ព្រោះ​នេះ​ជា​របក​គំហើញ​ដ៏​អស្ចារ្យ​មួយ។

បើ​តាម​មន្ត្រី​ក្រសួង​គ្រប់​គ្រង​វត្ថុ​បុរាណ​របស់​ប្រទេស​អេហ្សីប បាន​បញ្ជាក់​ថា តាម​សណ្ឋាន​នៃ​មឈូស អាច​បញ្ជាក់​បាន​ថា យ៉ាង​ហោច​ណាស់​ក៏​កប់​ក្រោម​ដី​ជាង ២​ពាន់​ឆ្នាំ​មក​ហើយ​ដែរ។ នេះ​បើ​ពិនិត្យ​ទៅ​លើ​ផ្នូរ និង​ទម្រង់​ជាក់​ស្ដែង​នៃ​មឈូស។ ក្រុម​អ្នក​ស្រាវជ្រាវ បាន​និយាយ​ថា មឈូស​អាច​ជា​របស់​អភិជន ឬ​ចៅ​អធិរាជ ដែល​រស់​នៅ​អំឡុង​ឆ្នាំ ៣២៣ រហូត​ដល់​ឆ្នាំ ៣០​មុន​គ្រិស្តសករាជ។ សម័យ​នោះ គឺ​ជា​ពេល​ដែល​ចក្រភព​រ៉ូម មាន​រឹបអូស​យក​ប្រទេស​អេហ្សីប​ទាំង​មូល។

ទោះ​បែប​នេះ​ក្ដី ក្រុម​អ្នក​ស្រាវជ្រាវ​មួយ​ចំនួន បាន​អះ​អាង​ថា មឈូស​ប្រវែង ៣​ម៉ែត្រ​នេះ ប្រហែល​ជា​តូច​ណាស់ សម្រាប់​អធិរាជ Alexander the Great ដែល​ជា​មនុស្ស​មាឌ​ធំ​ក្រអាញ នា​សម័យ​ចក្រភព​រ៉ូម៉ាំង​នោះ។ ចំណែក​អ្នក​និពន្ធ​ជន​ជាតិ​អាមេរិក បាន​និយាយ​ចំអក​ថា មិន​បាច់​បើក​ទេ ព្រោះ​ក្នុង​នោះ​គ្មាន​អ្វី​ឡើយ មិន​មែន​ដូច​រឿង​កុន​ឡើយ។

គួរ​បញ្ជាក់​ថា ព្រះ​ចៅ​អធិរាជ Alexander the Great ជា​បុគ្គល​ដ៏​អស្ចារ្យ​មួយ ដែល​ដឹក​នាំ​ចក្រ​ភព​ក្រិក​បុរាណ និង​គ្រប់​ដែន​ដី​ស្ទើរ​ពាក់​កណ្ដាល​ពិភពលោក លាត​សន្ធឹង​ដល់​ប្រទេស​ឥណ្ឌា នៃ​ទ្វីប​អាស៊ី។ ព្រះ​អង្គ បាន​ប្រសូត​នៅ​ឆ្នាំ ៣៥៦​មុន​គ្រិស្តសករាជ និង​សុគត​ទៅ​វិញ​នៅ​ឆ្នាំ ៣២៣​មុន​គ្រិស្តសករាជ ហើយ​បើ​គិត​ទៅ គឺ​ព្រះ​អង្គ​មាន​ព្រះ​ជន្ម​លើ​ផែន​ដី ត្រឹម ៣៣ ​ព្រះ​វស្សា​ប៉ុណ្ណោះ។ មូលហេតុ​នៃ​ការ​សុគត​ពេល​នោះ គឺ​ដោយសារ​មាន​ជំងឺ​ធ្ងន់ធ្ងរ មិន​អាច​ព្យាបាល​បាន។

ដោយសារ​ព្រះ​អង្គ​មាន​ទ្រព្យ​សម្បត្តិ​មហាសាល ពិធី​បុណ្យ​ព្រះ​សព​របស់​ព្រះ​អង្គ ត្រូវ​ចំណាយ​លុយ​សរុប ៦០០​លាន​ដុល្លារ (គិត​លុយ​បច្ចុប្បន្ន)។ ព្រះ​សព​ទ្រង់ ត្រូវ​បាន​ដឹក​តាម​រទេះ​សេះ​មាស​សុទ្ធ ហើយ​រទេះ​នោះ ត្រូវ​បាន​អូស​ដោយ​សេះ ៦០​ក្បាល ដើម្បី​ហែ​សព​ទ្រង់​ទៅ​បញ្ចុះ​នៅ​ទី​កន្លែង​កំណើត។ ព្រះ​អង្គ ល្បី​រន្ទឺ​ខ្លាំង ដោយសារ​សមត្ថភាព​ច្បាំង​ឈ្នះ​អស់​សត្រូវ រហូត​ដណ្ដើម​បាន​ដែន​ដី​ជា​ច្រើន បង្កើត​ជា​ចក្រភព​រ៉ូម៉ាំង​ដ៏​អស្ចារ្យ៕

ហាមលួចចម្លងអត្ថបទ​ពីវេបសាយ Morningfresh.news ដោយគ្មានការអនុញ្ញាត