លាទាំងអាល័យ! ខំស្រលាញ់ធ្វើសង្សារ​នឹងគ្នា៩ឆ្នាំ បែរត្រូវព្រាត់គ្នា​ដោយសាររឿងនេះ

រឿង​រ៉ាវ​ស្នេហា​មួយ​កំពុង​ធ្វើ​ឲ្យ​មនុស្ស​ជា​ច្រើន​រំជួល​ចិត្ត​អាណិត និង​​ភ្ញាក់​ផ្អើល​នៅ​តាម​បណ្ដាញ​សង្គម​ហ្វេសប៊ុក​ បន្ទាប់​ពី​​​ឃើញ​ទំនាក់​ទំនង​ជា​សង្សារ​នឹង​គ្នា​រហូត​ដល់​ទៅ​ជាង ៩​ឆ្នាំ ​បែរ​ចុង​ក្រោយ​ត្រូវ​ព្រាត់​ប្រាស់​គ្នា​ទាំង​ចិត្ត​អ្នក​ទាំង​ពីរ​នៅ​ស្រលាញ់​គ្នា​ស្ទើរ​លេប។

​បុរស​ស្មោះ​ស្នេហ៍​ម្នាក់​ បាន​បង្ហាញ​ភាព​សោក​ស្ដាយ​ មិន​អស់​អាល័យ​ចំពោះ​មិត្ត​ស្រី​ដែល​ខ្លួន​បាន​ស្រលាញ់ ថែ​រក្សា​ដូច​ផ្កា​ ​ជិត​មួយ​ទសវត្សរ៍ បែរ​​ត្រូវ​ទៅ​រៀប​ការ​ជាមួយ​បុរស​ផ្សេង ធ្វើ​ឲ្យ​លោក​មាន​វិប្បដិសារី​យ៉ាង​ខ្លាំង។ ​តាម​ការ​រៀប​រាប់​ បុរស​កម្សត់​នេះ​បាន​ស្វែង​យល់​ស្គាល់​ចិត្ត​គ្នា​អស់​ហើយ​ជាមួយ​មិត្ត​ស្រី​ សាង​អនុស្សាវរីយ៍​ល្អៗ ​ដើរ​លំហែ​កន្លែង​មិត្ត​ស្រី​ប្រាថ្នា​ យំ​ផង សើច​ផង​រាប់​មិន​អស់ ​ដឹក​ដៃ​គ្នា​ឆ្លង​កាត់​ឧបសគ្គ​រាប់​ពាន់​ជំពូក តែ​មិន​អាច​ឆ្លង​កាត់​ឧបសគ្គ​ដ៏​ធំ​ចុង​ក្រោយ​នេះ​បាន ទើប​ធ្វើ​ឲ្យ​បែក​បាក់​គ្នា។

​តាម​រយៈ​សារ​ក្ដុក​ក្ដួល​ចិត្ត​របស់​បុរស​ជា​មិត្ត​ប្រុស​​មាន​គណនី​ហ្វេសប៊ុក​ឈ្មោះ Yat Toch បាន​សរសេរ​លា​ចំណង​ស្នេហ៍​ជា​​សង្សារ​ដែល​មាន​រយៈ​​ដ៏​យូរ​អង្វែង​នេះ​ថា «​លា​ហើយ​នាម​ជា​សង្សារ​ ៩ឆ្នាំ! ​ថ្ងៃនេះ​ជា​ថ្ងៃ​ចុង​ក្រោយ​​យើង​ទាំង​២នាក់ លា​ហើយ​ឈ្មោះ​ថា​ជា​សង្សារ​នឹង​គ្នា​។ ស្រលាញ់​គ្នា​រាប់​ឆ្នាំ ជា​សង្សារ​នឹង​គ្នា​ក៏​រាប់​ឆ្នាំ​ដែរ ក៏​តែងតែ​ឈ្លោះប្រកែក ខឹង អន់ចិត្ត​នឹង​គ្នា​រាប់មិនអស់​ ​អនុស្សាវរីយ៍​យើង​ទាំង២ក៏​ច្រើន​រាប់​អស់​ដែរ។

តែ​ថ្ងៃ​នេះ ជា​ថ្ងៃ​ចុងក្រោយ​ហើយ អស់​ហើយ​និស្ស័យ​ជា​សង្សារ អស់​ហើយ​ឈ្មោះ​ថា​ជា​សង្សារ​នឹង​គ្នា​បន្ត​ទៀត​​ហើយ​ក៏​គ្មាន​ថ្ងៃ​នឹង​វិលត្រឡប់ មក​រក​ភាព​សង្សារ​នឹង​គ្នា​សា​ជា​ថ្មី​ដែរ​។ ​លា​ហើយ​នាម​ជា​សង្សារ លា​ហើយ​ណា លា​ហើយ​មនុស្ស​ល្អ​របស់​បង​​ហើយ​ក៏​ដឹង​មុន​ថា ​ពួក​យើង​នឹង​មាន​ថ្ងៃនេះ គឺ​ថ្ងៃ​ដែល​យើង​ត្រូវ​ព្រាត់​គ្នា​រហូត​!​ តែ​ក៏​អ​គុណ សម្រាប់​គ្រប់​យ៉ាង​កន្លងមក អរគុណ ដែល​តែងតែ​បំពេញ​តួនាទី ជា​សង្សារ​និង​គ្នា​បាន​យ៉ាង​ល្អ។

អ​រគុណ​ដែល​ស្រលាញ់​នៅ​ក្បែរ​មើលថែ​គ្នា ដោយ​ចិត្ត​និង​ចិត្ត មិន​គិត​មិន​ខ្វល់​ពី​អ្នកដទៃ ចង់​អ្នក​ណា​និយាយ​អី ក៏​អូន​មិន​ដែល​នឹង​ខ្វល់ ឬ​រេរា​តាម​ពាក្យ​គេ​ដែរ តែ​ថ្ងៃ​នេះ ហើយក៏​ជា​ថ្ងៃ​ចុង​ក្រោយ​រវាង​យើង​ទាំង​២ ដែល​ជា​សង្សារ ព្រោះ​ពេល​នេះ​អូន​មាន​គូរ​ដណ្ដឹង ហើយ​បន្តិចទៀត​អូន​ក៏​ត្រូវ​រៀប​ការ​ដែរ​។ មិន​គួរណា​ការ​តស៊ូ ព្យាយាម​ស្រលាញ់​អូន បង​បាន​ទ្រាំ និង​ឆ្លងកាត់​នូវ​បញ្ហា ការ​លំបាក​ជាច្រើន តែ​ទីបញ្ចប់​បង​នៅ​តែ​ត្រូវ​បាត់​បង់​អូន​។

បង​មិន​ខឹង​នឹង​អូន​ទេ ធ្វើ​ម៉េច​បើ​ពួក​យើង​ទាំង២​មិនមែន​គូនឹង​គ្នា សុំទោស​រយៈ​កន្លងមក​ដែល​បង​មើលថែ​អូន​មិនបាន​ល្អ ជាតិ​ក្រោយ​បង​នឹង​សង​អូន​គ្រប់យ៉ាង​ (​ហេតុ​អ្វី​កូនកំលោះ​មិនមែន​ជា​ខ្ញុំ ហេតុ​អ្វី​ឈុត​កូនកំលោះ​មិន​មែន​ជា​ខ្ញុំ​ជា​អ្នក​ពាក់​…​ហេតុអ្វី​»? ​បើ​តាម​ការ​បញ្ជាក់​របស់​បុរស​​អភ័ព្វ​ស្នេហ៍​ខាង​លើ មូល​ហេតុ​បែក​គ្នា គឺ​គ្រួសារ​សង​ខាង​មិន​ត្រូវ​គ្នា​ទើប​ក្លាយ​ជា​បែប​នេះ។

ចំណែក​អ្នក​ប្រើ​ប្រាស់​ហ្វេសប៊ុក​បាន​បញ្ចេញ​មតិ​ខុស​ៗ​គ្នា​ចំពោះ​ចំណង​ស្នេហ៍​អ្នក​ទាំង​ពីរ «ការ​ស្រលាញ់គ្នា​យើង​ត្រូវ​ការស្វែក​យល់ចិត្ត​គ្នា​វា​ជា​រឿង​ត្រឹមត្រូវ​ហើយ តែ​នេះ​យូរ​ពេក​ហើយ​ណា​បងប្រុស​អើយ សម្រាប់​មនុស្ស​ស្រី​គ្រប់គ្នា​អ្វី​ដែល​ហួសហើយ​សូម​បង​គិត​សារ​ជា​ថ្មី​ទៅ​បង​​លើក​ក្រោយ​កុំអោយ​មាន​រឿង​ចឹង​ទៀត​ណាបង​ត្រូវ​ចេះ​ថែ​រក្សា​នាង​អោយ​បាន​ល្អ ហើយ​នឹង​ធ្វើ​អ្វី​អោយ​នាង​ជឿ​ថា​ បង​ស្រលាញ់​នាង​ជា​អ​នាគ​តពិត​ប្រាកដ​មែន។​

​គួរតែ​សួរ​ខ្លួនឯង​ទើបត្រូវ ៩​ឆ្នាំ​ល្មម​ហើយ នាង​អត់ធ្មត់​ចាំ​អ្នក​ ៩​ឆ្នាំ​ហើយ ឆ្លងកាត់​មាត់ចាបមាត់ព្រាប​អ្នក​ជិត​ខាង​គ្រប់​សព្វ​បែប​យ៉ាង ប៉ុន្តែ​ចុះ​អ្នក​វិញ នៅតែ​មិន​ផ្តល់​ក្តី​ស្នេហា​ដ៏​ជាក់លាក់​សម្រាប់​នាង គ្មាន​មនុស្ស​ស្រី​ណា​ចង់​រស់នៅ​ក្នុង​នាម ជា​សង្សារ​អស់​មួយ​ជីវិត​ទេ​។​ ​ដូច្នេះ​ល្មម​ដល់​ពេល​ហើយ ដែល​នាង​ត្រូវ​បើក​ឱកាស​ឲ្យ​ខ្លួនឯង រក​មនុស្ស​ដែល​គិត​ពិតប្រាកដ​រឿង​អនាគត​ជាមួយ​នាង​។

​គេ​ជា​ស្រី​គេ​មិនមែន​ប្រុស​ទេ អោយ​គេ​ចាំ​គេ​មិន​មែន​នៅក្មេង​រហូត​ទេ ហើយ​មិនដឹង​ទ្រាំ​យ៉ាងណាទេ ហើយ​មិនដឹង​ទទួល​ពាក្យ​សំដី​មាត់​ចា​មាត់​ព្រាប​ប៉ុណ្ណា​ទេ បើ​ស្រឡាញ់​ពិត​មិច​មិន​ចូល​ដណ្តឹង​គេ ឫ​ចាំ​គេ​ចូល​ដណ្តឹង​វិញ ឫ​ចាំ​ទាល់តែ​មាន​អ្វីៗ​គ្រប់យ៉ាង​បើ​ចាំ​ទាល់តែ​មាន​អ្វីៗ​គ្រប់​គឺ​វា​ចឹង គេ​ក៏​ចង់​រៀបការ​ដូច​ស្រី​ដទៃ​ដែល ពេល​គេ​នៅ​មិន​ថែ​មិន​ផ្តល់​អ្វីដែល​គេ​ចង់បាន ដល់​ពេល​បាត់បង់​ទើប​ស្តាយក្រោយ​ទោះ​ស្តាយក្រោយ​ក៏​ហួល​ពេល​ដែល ចូល​ចាំ​ផង​ទៅ​កុំ​ធ្វើ​ដាក់​មនុស្ស​ស្រី​ដែល​ត្រូវ​មក​ជួប​អ្នក​ក្រោយ​ទៀត។

មនុស្ស​ស្រី​ណា​ក៏​ដូច​មនុស្ស​ស្រី​ណា​តែងតែ​ចង់បាន​ផ្កាស្លា​ពី​មនុស្ស​ដែល​នាង​ស្រលាញ់​ពេញចិត្ត​។ នាង​ទុក​ពេល​ឲ្យដល់​ទៅ​៩​ឆ្នាំ តែ​អ្វី​ដែល​បាន​មក​វិញ គឺ​ការ​ខកបំណង​។ នាង​សម្រេច​ចិត្ត​ជ្រើសរើស​អ្នកថ្មី ក៏​ព្រោះតែ​អ្នក​។ មនុស្ស​ប្រុស​ចង់​នៅ​លីវ​៣០ ឬ​៤០​ឆ្នាំ​ក៏​មិន​មាន​បញ្ហា តែ​នាង​ជា​មនុស្ស​ស្រី អ្នក​ថា​ស្រលាញ់​នាង អ្នក​មាន​ដែល​គិត​ពី​អារម្មណ៍​នាង​អនាគត​នាង​ទេ​»?

​បុរស​ជា​សង្សារ​ដដែល​​បញ្ជាក់​​បន្ថែម​ថា ​«ខ្ញុំ​ត្រូវ​រៀប​ការ​តាំង​ពី ៥ឆ្នាំ​មុន​មក​ម៉្លេះ តែ​មាន​បញ្ហា​គ្រួសារ ពួក​យើង​បាន​លួច​លាក់​ស្រលាញ់​គ្នា ​ទើប​តែ​ពេល​នេះ​ម៉ាក់​ខាង​ស្រី​ដឹង ក៏​បង្ខំ​ឲ្យ​នាង​រៀប​ការ​ជាមួយ​បុរស​ផ្សេង។ ​នាង​ស្រលាញ់​ខ្ញុំ តែ​នាង​ក៏​ត្រូវ​​តាម​គ្រួសារ​ដែរ មាន​តែ​បង្ខំ​​បែក​គ្នា​ទាំង​ចិត្ត​នៅ​ស្រលាញ់»៕ (សម្រួល​អត្ថបទ៖ Morning Fresh)

ហាមលួចចម្លងអត្ថបទ​ពីវេបសាយ Morningfresh.news ដោយគ្មានការអនុញ្ញាត
error: ហាម​លួចចម្លង​អត្ថបទ​នេះ!