មានករណីអួលបបរ អួលបាយ និងអួលទឹក បណ្ដាលឲ្យស្លាប់ជួយមិនទាន់ យើងគួរប្រុងប្រយ័ត្ន
លោក ស្រី វុទ្ធី អធិការនគរបាលស្តីទីស្រុកកំរៀង បានបញ្ជាក់ឲ្យដឹងថាមានករណី មន្ត្រីប្រធានច្រកទ្វារតំបន់ព្រំដែនម្នាក់ស្លាប់ ខណៈពេលកំពុងហូបបបរ។ ហេតុការណ៍នេះ បានកើតឡើងនៅរំលងអធ្រាត្រថ្ងៃទី១៧ ខែឧសភា ឆ្នាំ២០២១ ត្រង់ចំណុចស្រុកកំរៀង ខេត្តបាត់ដំបង។
ជនរងគ្រោះជាប្រធានច្រកទ្វារតំបន់ព្រំដែនសួនស៊ុំ ឋិតក្នុងស្រុកកំរៀង ខេត្តបាត់ដំបង គ្រាដែលជនរងគ្រោះកំពុងហូបបបរស ហើយក៏ស្ទះក្នុងបំពង់ខ្យល់បណ្តាលឲ្យស្លាប់តែម្តង។ ជនរងគ្រោះមានឈ្មោះ ចែត្រ សិថា ភេទប្រុស អាយុ ៥២ឆ្នាំ មុខរបរជាអនុប្រធានអង្គភាពលទ្ធកម្មសាលាខេត្ត និងជាប្រធានទីស្នាក់ការត្រួតពិនិត្យច្រកទ្វារ តំបន់ព្រំដែនសួនស៊ុំ ប្រចាំស្រុកកំរៀង ខេត្តបាត់ដំបង។
ប្រភពព័ត៌មាននៅកន្លែងកើតហេតុបានប្រាប់ឲ្យដឹងដែរថា សភាពចៃដន្យដូចគ្នានេះ ជនរងគ្រោះធ្លាប់ជួបម្តងរួចមកហើយ ប៉ុន្តែត្រូវគ្រូពេទ្យជួយសង្គ្រោះទាន់ពេលវេលា។ រហូតដល់ថ្ងៃកើតហេតុចុងក្រោយនេះ ជនរងគ្រោះបានទៅហូបបបរជាមួយមិត្តភក្តិម្តងទៀត នៅក្នុងភូមិសាស្ត្រស្រុកកំរៀងមិនយូរប៉ុន្មាន ស្រាប់តែឈ្លក់បបរទំនងអាហារបានធ្លាក់ចូលក្នុងបំពង់ខ្យល់ បណ្តាលឲ្យស្ទះហើយត្រដរខ្យល់ភ្លាមៗ មិត្តភក្តិបានបញ្ជូនទៅសង្គ្រោះបន្ទាន់នៅមន្ទីរពេទ្យដល់ពាក់កណ្តាលផ្លូវក៏ផុតដង្ហើមស្លាប់តែម្តង។
ជុំវិញករណីខាងលើក្រោយពីសមត្ថកិច្ចជំនាញពិនិត្យសពបានសន្និដ្ឋានថា បណ្តាលមកពីស្ទះបំពង់ខ្យល់ពិតប្រាកដរួច បានប្រគល់សពជនរងគ្រោះទៅឲ្យសាច់ញាតិក្រុមគ្រួសារ ដើម្បីធ្វើបុណ្យតាមប្រពៃណី។ គួរបញ្ជាក់ថា ហេតុការណ៍ស្រដៀងគ្នានេះ បានកើតឡើងច្រើនករណីមកហើយមានដូចជា អួលបាយ អួលទឹក ដែលយើងគ្រប់គ្នាធ្វើជាប្រចាំថ្ងៃ ហើយគិតថាមិនគួរកើតមាន បែរជាគ្រោះថ្នាក់។ យើងសូមលើករឿងរ៉ាវ ២ករណីទៀត ដែលបានកើតឡើងកាលពីពេលថ្មីៗ ទុកជាការប្រុយប្រយ័ត្នបន្ថែម។
ករណីអួលបាយ៖ ហេតុការណ៍នេះបានកើតឡើងកាលពីថ្ងៃទី១៣ ខែមេសា ឆ្នាំ ២០២០ វេលាម៉ោង ១១៖ ០០នាទីនៅក្នុងរោងចក្រ កាត់ដេរមេតថេក ខេមបូឌា ខប លីមីធីត ស្ថិតនៅភូមិអំពិលលេី ឃុំអំពិល ស្រុកកំពង់សៀម ខេត្តកំពង់ចាម មានករណីអួលបាយបណ្តាលឱ្យស្ត្រីម្នាក់ស្លាប់។ ជនរងគ្រោះមានឈ្មោះ ណៃ រដ្ឋា ភេទស្រី អាយុ ៤១ ឆ្នាំ ខណៈពេលកំពុងហូបបាយ នៅក្នុងអគាររោងចក្រ។
ពេលភ្លាមនោះអ្នកហូបបាយជាមួយ បាននាំគ្នាយកគាត់មកពេទ្យដែលប្រចាំការក្នុងរោងចក្រ ពេលយកមកដល់ពេទ្យដែលប្រចាំការបានបញ្ជូនមកពេទ្យខេត្តកំពង់ចាម ពេលមកដល់ពេទ្យ កំពង់ចាម ជនរងគ្រោះបានស្លាប់បាត់ទៅហេីយ និងបានដឹកបន្តទៅផ្ទះនៅភូមិកោះប្រាក់ ឃុំកោះទន្ទឹម ស្រុកកំពង់សៀម ខេត្តកំពង់ចាម ដើម្បីប្រគល់សពជូនក្រុមគ្រួសារធ្វើបុណ្យតាមប្រពៃណី។
ករណីអួលទឹក៖ ហេតុការណ៍នេះយើងពុំទទួលបានព័ត៌មានលម្អិតនោះទេ បានត្រឹមតែឃើញសាច់ញាតិបង្ហោះសារខ្លីមួយ អមជាមួយរូបថតកាលពីខែកុម្ភៈ ឆ្នាំ ២០២១នេះថា “ដោយសារទឹកមួយក្អឹក អួលផ្ដាច់យកជីវិតប្អូនប្រុសខ្ញុំទៅ ចោលប្រពន្ធកូន បងសោកស្ដាយណាស់”៕
