ភាពខុសគ្នារវាងចូលឆ្នាំថ្មីរបស់ខ្មែរ និងចូលឆ្នាំថ្មីរបស់សៀម ដែលយើងគួរសិក្សា ស្វែងយល់
ចំណេះដឹងទូទៅដោយសង្ខេបឆ្នាំនេះ ចូលឆ្នាំថ្មីខ្មែរ និងថៃ (សៀម) សង្ក្រាន្តចូលដល់នៅម៉ោងដូចគ្នា តែសៀមលើកនៅតែជាថ្ងៃអង្គារទី១៣ដដែល មិនរាប់ចូលថ្ងៃថ្មីដូចខ្មែរទេ។ ខ្មែររាប់លំអានតាមសុរិយគតិដូចលោកខាងលិច ឱ្យតែឆ្លងម៉ោង១២យប់ខ្មែររាប់ចូលជាថ្ងៃថ្មី រីឯថៃរាប់លំអានតាមចន្ទគតិ និងទំនៀមតាមព្រះពុទ្ធសាសនា។
ដរាបណាអរុណមិនទាន់រះពីទិសឯកើតក្រហមច្រាល ឬមើលស្រមោលខ្លួនមិនទាន់ឃើញ ថៃនៅតែរាប់ថាជាថ្ងៃចាស់ដដែល លុះត្រាតែយាមវេលាម៉ោងប្រហែល ៥ទៅ៥កន្លះស្វាងស្រាងៗមើលមុខគ្នាឃើញ ទើបថៃរាប់ថាជាថ្ងៃថ្មី ។ល។ បើតាមលោក ជា ចាន់នី គឺថ្ងៃចូលឆ្នាំថ្មី៣ថ្ងៃ ថៃសរុបហៅថា វ៉ាន់ស៊ុងក្រាន (ថ្ងៃសង្ក្រាន្ត)មិនសូវផ្ដោតរឿងតុបតែងគ្រឿងសក្ការទទួលទេវតាដូចខ្មែរទេ តែគេផ្ដោត និងនិយមទៅស្រង់ព្រះនៅវត្ត ឬនៅផ្ទះ សាចទឹកបាចទឹកដាក់គ្នាសឹងតែ៩៩ភាគរយទូទាំងប្រទេស ពាក់អាវផ្កាអាវពណ៌យកសិរីសួស្ដី ។ល។
សង្ក្រាន្តសៀមបានម៉ោងដូចខ្មែរតែរាប់ជាថ្ងៃអង្គារទី១៣ ចំ បុត្រីទី៣នៃកបិលមហាព្រហ្ម ទេពធីតាព្រះនាមថារក្សាទេវី គង់ប្រថាប់លើវារហៈ(ជ្រូកព្រៃ) ជាពាហនៈ ព្រះហស្តស្ដាំទ្រង់ត្រីសូល៍ ព្រះ ហត្ថឆ្វេងទ្រង់សរ (ធ្នូ) ភក្សាហារសោយលោហិតំ(ឈាម)ជាអាហារ។ សង្ក្រាន្តខ្មែរបានម៉ោងដូចសៀម តែរាប់ជាថ្ងៃពុធទី១៤ ចំបុត្រីទី៤នៃកបិលមហាព្រហ្ម ទេពធីតាព្រះនាមមណ្ឌាទេវី គង់ប្រថាប់លើគទ្រភៈ(សត្វលា) ព្រះហស្តស្ដាំទ្រង់សុណា(ម្ជុល) ព្រះហស្តឆ្វេងទ្រង់យដ្ឋិ(ឈើច្រត់), ភក្សាហារសោយសប្បិ(ទឹកដោះថ្លា)ជាអាហារ ។ល។
ចំណុចខុសគ្នា ថ្ងៃអង្គារទេពធីតាបុត្រីទី៣ កបិលមហាព្រហ្ម -ខ្មែរ ហៅគោរាក្សសាទេវី គង់ប្រថាប់លើអស្សតរ(សេះ) ជាពាហនៈ។ -សៀម ហៅរាក្សសាទេវី គង់ប្រថាប់លើវារហៈ(ជ្រូកព្រៃ)ជាពាហនៈ(ព្រះសព្វាវុធនិងព្រះស្ងោយខ្មែរ និងថៃដូចគ្នា)។ ចំណាំ ថ្ងៃចូលឆ្នាំទី១ ខ្មែរហៅថ្ងៃមហាសង្ក្រាន្ត ថ្ងៃទី២វារៈវនប័ត ថ្ងៃទី៣វារៈឡើងស័ក (ដូច្នេះឆ្នាំនេះថ្ងៃទី១៦ទើបឈានចូលជា ត្រីស័ក, បើសរសេរជាឯកសារថ្ងៃទី១៤-១៥នៅជា ទោស័កដដែល) ៕
