ប្ដីលួចមានស្រីមកសុំប្រពន្ធលែង នាងសុំឲ្យធ្វើល្អ១ខែទៀត ចុងក្រោយជួប​រឿងមិននឹកស្មាន

ខ្ញុំ និង​ភរិយា​បាន​រៀបការ​រួមរស់​ជាមួយ​គ្នា​រយៈពេល​ជាង ១០​ឆ្នាំ​ហើយ កម្រ​ទាស់ទែង​គ្នា​ណាស់ ប៉ុន្តែ​មួយរយៈ​ចុងក្រោយ​នេះ ខ្ញុំ​អស់​អារម្មណ៍​ស្រលាញ់​នាង​តែម្ដង​។ ពេល​ខ្ញុំ​មកដល់​ផ្ទះ​នៅ​យប់​មួយ ប្រពន្ធ​ខ្ញុំ​បាន​លើក​បាយល្ងាច​ឲ្យ​ញ៉ាំ ខ្ញុំ​បាន​កាន់​ដៃ​នាង​យ៉ាង​ជាប់ ព្រោះ​ចង់​និយាយ​រឿង​មួយ​ប្រាប់​នាង​។​

​នាង​អង្គុយ​ចុះ និង​ចាប់ផ្ដើម​ញ៉ាំ​បាយល្ងាច​យ៉ាង​ស្ងៀមស្ងាត់​ដូច​សព្វដង​។ ខ្ញុំ​សង្កេត​ឃើញ​កែវភ្នែក​ប្រពន្ធ​ខ្ញុំ​ពោរពេញ​ដោយ​ភាពឈឺចាប់ ធ្វើឲ្យ​ខ្ញុំ​កាន់តែ​ពិបាក​ហើប​មាត់ប្រាប់​នាង​ទៅទៀត​។ ប៉ុន្តែ​ខ្ញុំ​បាន​តាំងចិត្ត​ថា ត្រូវតែឲ្យ​នាង​ដឹងពេលនេះ​នូវ​អ្វី​ខ្ញុំ​កំពុង​គិត​។ ខ្ញុំ​បាន​កាន់​ដៃ​នាង​ម្ដងទៀត និង​និយាយ​ទាំង​បង្ខំ​ថា “​បង​ចង់​លែងលះ​!”

​ពេលឮ​ខ្ញុំ​និយាយ​ភ្លាម នាង​ហាក់​មិន​ភ្ញាក់ផ្អើល តែ​បាន​ដំអក់​មួយ​ភ្លែត រួច​នាង​សួរ​មក​ខ្ញុំ​ថ្នមៗ​វិញ​ថា «​ហេតុ​អ្វី​បង​»? ខ្ញុំ​បាន​ព្យាយាម​គេច​ឆ្លើយ​សំណួរ​នេះ​មិន​ប្រាប់​មូលហេតុ ធ្វើឲ្យ​នាង​ចាប់ផ្ដើមខឹង​មួយ​រំពេច​។ នាង​បាន​គ្រវែង​ចង្កឹះ​ចេញពី​តុ និង​ស្រែក​ដាក់​ខ្ញុំ​ថា “​បង​មិន​មែន​ជា​មនុស្ស​ប្រុស​ទេ​!”

​នៅ​យប់​នោះ យើង​មិន​បាន​និយាយ​រក​គ្នា​ឡើយ​។ នាង​គេង​សម្រក់​ទឹកភ្នែក​ទាំង​ខ្សឹកខ្សួល​បែរខ្នង​ដាក់​។ ខ្ញុំ​ដឹង​ក្នុង​ចិត្ត​ថា នាង​ក៏​ចង់​ដឹង​ហេតុផល​អ្វី​មក​ជ្រៀតជ្រែក​ជីវិត​អាពាហ៍ពិពាហ៍​របស់​យើង​ដែរ​។ ប៉ុន្តែ​ខ្ញុំ​ពិបាក​នឹង​ឆ្លើយ​ប្រាប់​ចម្លើយ​សមស្រប​មួយ​ខ្លាំងណាស់ យ៉ាង​ណា​ខ្ញុំ​បាន​ព្យាយាម​និយាយ​ទៅកាន់​នាង​ថា “​បង​បាន​ប្រគល់​បេះដូង​ឲ្យទៅ​នារី​ម្នាក់​ទៀត​ហើយ​ឈ្មោះ ចេ​ន​។ បង​លែង​ស្រលាញ់​អូន​ហើយ​។ បង​រស់នៅ​ជាមួយ​អូន​នេះ បង​គ្រាន់តែ​អាណិត​អូន​ប៉ុណ្ណោះ​”​។​

​ខ្ញុំ​បាន​សរសេរ​ក្នុង​លិខិត​លែងលះ​មួយ​ថា នាង​អាច​ទទួលបាន​ផ្ទះ រថយន្ត​មួយ​គ្រឿង និង​ភាគហ៊ុន​ក្រុមហ៊ុន​ខ្ញុំ​ចំនួន ៣០%​។ នាង​បាន​សម្លឹង​ដាក់​ខ្ញុំ ហើយ​ក៏​ហែក​លិខិត​នោះ​ចោល​ភ្លាម នាង​ចាប់ផ្ដើម​មាន​អាកប្បកិរិយា​ចម្លែក​។ ខ្ញុំ​មាន​អារម្មណ៍​អាណិត​នាង​ដែល​បាន​ចំណាយ​ពេលវេលា ធនធាន និង​ថាមពល​ពេល​នៅ​ជាមួយ​ខ្ញុំ ប៉ុន្តែ​ខ្ញុំ​មិន​អាច​ត្រលប់​ក្រោយ​វិញ​បាន ព្រោះ​ស្រលាញ់​នាង ចេ​ន ទៅហើយ​។ ទីបំផុត​នាង​បាន​ស្រែកយំ​ខ្លាំងៗ នៅ​ចំពោះមុខ​ខ្ញុំ​។​

​នៅ​ថ្ងៃ​បន្ទាប់ ខ្ញុំ​បាន​ត្រលប់​មក​ពី​ធ្វើការ​យឺត ហើយ​ខ្ញុំ​បាន​ឃើញ​នាង​សរសេរ​សំបុត្រ​មួយ​នៅ​លើ​តុ​។ ខ្ញុំ​មិន​បាន​ញ៉ាំ​អាហារ​ពេលយប់ ខ្ញុំ​ក៏​ដើរ​ហួស​ទៅ​ដេក​យ៉ាង​លឿន ព្រោះ​អស់កម្លាំង​។ នៅ​ពេល​ខ្ញុំ​ក្រោក​ពី​គេង​វិញ នាង​នៅ​តែ​សរសេរ​សំបុត្រ​នោះ​នៅ​លើ​តុ​ដដែល​។​ខ្ញុំ​ធ្វើ​មិន​ខ្វល់ ហើយ​សម្ងំ​ដេក​ម្ដងទៀត​។​

​លុះដល់​ព្រឹក​ឡើង នាង​បង្ហាញ​លក្ខខ័ណ្ឌ​នៃ​ការលែងលះ​យ៉ាង​លម្អិត​។ នាង​មិន​ចង់បាន​ទ្រព្យសម្បត្តិ​អ្វី​ទាំងអស់ ប៉ុន្តែ​នាង​ត្រូវការ​រយៈពេល ១​ខែ​ទៀត​មុន​ពេល​លែងលះ​។ នាង​បាន​ស្នើ​ថា «​មួយ​ខែ​ទៀត យើង​ទាំង​ពីរ​ព្យាយាម​រស់​នៅ​ដូច​ធម្មតា ព្រោះ​កូនប្រុស​របស់​យើង​កំពុង​ត្រៀម​ប្រលង ហើយ​ខ្ញុំ​មិន​ចង់​រំខាន​កូន​ដោយសារ​ដំណឹង​លែងលះ​គ្នា​នេះ​ទេ​»​។​

​ខ្ញុំ​បាន​យល់ព្រម ប៉ុន្តែ​នាង​មាន​អ្វី​បន្ថែម​មួយចំនួន​ទៀត នាង​បាន​សុំ​ឲ្យ​ខ្ញុំ​រម្លឹក​អនុស្សាវរីយ៍​នា​ថ្ងៃ​អាពាហ៍ពិពាហ៍​របស់​យើង​។ ខ្ញុំ​ប្រាប់​ថា ខ្ញុំ​បាន​លើក​បី​នាង​ចេញពី​បន្ទប់​កូនក្រមុំ​។ នាង​បាន​ស្នើសុំ​ក្នុង​រយៈ​មួយ​ខែ​ចុងក្រោយ​នេះ នាង​ចង់ឲ្យ​ខ្ញុំ​បី​នាង​ចេញ​ពីគ្រែ​គេង​របស់​យើង​ទៅ​មាត់ទ្វារ​ជា​រៀងរាល់​ព្រឹក​។ គ្រាន់​តែ​ស្ដាប់​ឮ​ភ្លាម ខ្ញុំ​គិតថា​នាង​ឆ្កួត​ហើយ ប៉ុន្តែ​យ៉ាងណា​ដើម្បី​ថ្ងៃ​ចុងក្រោយ ខ្ញុំ​សុខចិត្ត​ទទួល​យក​ធ្វើ​តាម​សំណើ​។​

​ពេល​ទៅដល់​កន្លែង​ធ្វើកា​រ ខ្ញុំ​បាន​ប្រាប់ ចេ​ន ដែល​ជា​សង្សារ​របស់​ខ្ញុំ​អំពី​លក្ខខ័ណ្ឌ​នៃ​ការលែងលះ​ជា​មួយប្រព​ន្ធ​ខ្ញុំ នាង​បាន​អស់សំណើច សើច​ឮៗ និង​គិត​ថា មិន​ទំនង​សោះ​។ ចេ​ន និយាយ​ទាំង​ប្រមាថ​ថា «​អត់​បញ្ហា​ទេ នាង​ជា​ប្រពន្ធ​ចង់​លេងល្បិច​អី​ក៏​លេង​ទៅ នាង​គង់តែ​លែងលះ​ដដែល​»​។​

​ខ្ញុំ និង​ប្រពន្ធ​បាន​ឈប់​ប៉ះពាល់​គ្នា​ទៀត ប៉ុន្តែ​ពេល​ខ្ញុំ​បំពេញ​បំណង​ឲ្យ​នាង​ដោយ​បី​ទៅ​មុខទ្វារ នៅ​ថ្ងៃ​លើកដំបូង ពួក​យើង​មាន​អារម្មណ៍​ហាក់​ខុស​ពី​ធម្មតា​បន្តិច​។ កូនប្រុស​បាន​ទះដៃ​ពីក្រោយ​ដោយ​ពុំ​ដឹង​រឿង និង​បាន​សរសើរ​ប៉ា​ថា «​ពូកែ​ណាស់ៗ​លោក​ប៉ា អាច​លើក​បី​ម៉ា​ក់រួច​»​។ ពាក្យ​សម្ដី​របស់​កូន​បាន​ធ្វើឲ្យ​ខ្ញុំ​ចុកចាប់​មួយ​រំពេច​។ ក្រោក​បី​ចេញពី​បន្ទប់​គេង​ទៅ​កាន់​បន្ទប់​ទទួលភ្ញៀវ រួច​ទៅ​មាត់ទ្វារ​ចម្ងាយ​តែ ១០​ម៉ែត្រ​ប៉ុណ្ណោះ​។​

​ពេល​លើក​បី​បណ្ដើរ នាង​បាន​បិទ​ភ្នែក និង​និយាយ​តិចៗ​ថា កុំ​ប្រាប់​កូន​យើង​ថា យើង​លែងលះ​គ្នា​ឲ្យសោះ​។ ខ្ញុំ​ងក់ក្បាល​យល់ព្រម​ទាំង​អារម្មណ៍​តូចចិត្ត​ខ្លួនឯង​បន្តិច​។ ខ្ញុំ​បាន​ដាក់​នាង​នៅ​ខាងក្រៅ​ទ្វារ​ចេញ​ចូល នាង​បាន​រង់ចាំ​ជិះ​រថយន្ត​ក្រុង​ទៅ​ធ្វើការ ហើយ​ខ្ញុំ​បើករថយន្ត​ម្នាក់ឯង​ទៅ​ធ្វើការ​នៅ​ការិយាល័យ​របស់​ខ្ញុំ​។​

​នៅ​ព្រឹក​ថ្ងៃទី ២ យើង​ទាំង​ពីរ​នាក់ បាន​បី​ទៅ​យ៉ាង​ស្រួល​។ នាង​បាន​ផ្អែក​លើ​ទ្រូង​ខ្ញុំ ខ្ញុំ​បាន​ស្រង់ក្លិន​ដ៏​ក្រអូប​ចេញពី​អាវ​របស់​នាង​។ ខ្ញុំ​ដឹង​ថា ខ្ញុំ​មិន​បាន​មើលថែ​ស្ត្រី​នេះ​ជា​យូរ​មក​ហើយ​។ នាង​មិនមែន​ជា​មនុស្ស​ក្មេង​ទៀត​ទេ មុខ​នាង​ជ្រួញ សក់​ចាប់ផ្ដើម​ប្រែជា​ប្រផេះ​។ គិត​ចុះ​គិត​ឡើង ធ្វើឲ្យ​ខ្ញុំ​នឹកឃើញ​ដល់​ថ្ងៃ​រៀបការ រហូត​ភ្លឹក​ស្ទើរ​មួយ​នាទី​។​

​នៅ​ថ្ងៃ​ទី ៣ និង​ទី ៤ នៅ​ពេល​ខ្ញុំ​បាន​លើក​នាង ខ្ញុំ​មាន​អារម្មណ៍​ថា ភាព​ស្និត​ស្នាល​ពួកយើង​ហាក់​ត្រលប់​មកវិញ ជាមួយ​នារី​ធ្លាប់​នៅ​ជាមួយគ្នា​ជាង ដប់​ឆ្នាំ​នេះ​។​

​នៅ​ថ្ងៃ​ទី ៥ និង​ទី ៦ ខ្ញុំ​ចាប់ផ្ដើម​កត់សម្គាល់ថា ភាព​ស្និត​ស្នាល​របស់​យើង​បាន​កើនឡើង​ម្ដងទៀត​។ ខ្ញុំ​មិន​បាន​ប្រាប់ ចេ​ន ពី​រឿង​នេះ​ឡើយ​។ ពីមួយថ្ងៃ​ទៅមួយថ្ងៃ វា​ធ្វើឲ្យ​ខ្ញុំ​កាន់តែ​ចង់​លើកបី​ប្រពន្ធ​ខ្ញុំ​រយៈពេល​មួយ​ខែ​នេះ​ដោយ​ភាព​រីករាយ​។ ប្រហែល ការចំណាយ​ពេល​នៅ​ក្បែរ​គ្នា​បន្តិចៗ​រៀង​រាល់ថ្ងៃ​នេះ​ហើយ បាន​ធ្វើឲ្យ​ការសម្រេចចិត្ត​របស់​ខ្ញុំ​ត្រូវ​ពិចារណា​ឡើងវិញ​។​

​នៅ​ព្រឹក​បន្ទាប់ នាង​កំពុង​រើស​ជជុះៗ​សំលៀក​បំពាក់​ទៅ​ធ្វើការ នាង​មាន​អារម្មណ៍​ប្លែក​ព្រោះ​ខោអាវ​ទាំងនោះ​ធំៗ​ជាង​ខ្លួន​។ ខ្ញុំ​គិតថា ខោអាវ​ទាំងនោះ​មិន​រីក​ធំ​ទេ តែ​មក​ពី​នាង​ចាប់ផ្ដើម​ស្គម​ដោយសារ​គិត​រឿងរ៉ាវ​ច្រើន​ក្នុង​រយៈពេល​ចុងក្រោយ​នេះ​។ សកម្មភាព​នាង​ចាប់ផ្ដើម​ធ្វើឲ្យ​ខ្ញុំ​ឈឺចាប់​ក្នុងចិត្ត ភ្លាមៗ​នោះ ខ្ញុំ​បាន​យកដៃ​ទៅ​ប៉ះ​ក្បាល​របស់​នាង​ដោយ​មិន​ដឹង​ខ្លួន​។​

​កូនប្រុស​របស់​ពួកយើង​បាន​មក​ដល់​ល្មម និង​និយាយ​ទាំង​រីករាយ​ថា «​ប៉ា​! ដល់​ពេល​បី​ម៉ាក់​ចេញទៅ​ហើយ​»​។ ប្រពន្ធ​ខ្ញុំ​បាន​ដើរ​ទៅ​ឱប​កូនប្រុស​យ៉ាង​ណែន​។ ខ្ញុំ​បាន​ព្យាយាម​ងាក​មុខ​ចេញ ព្រោះ​ខ្លាច​ធ្វើឲ្យ​ខ្ញុំ​កែប្រែ​ចិត្ត​វិញ​នៅ​ពេល​នេះ​។ ខ្ញុំ​ចាប់ផ្ដើម​កាន់​ដៃ​នាង នាង​បាន​ដាក់​ដៃ​លើ​.​ក​ខ្ញុំ​យ៉ាង​ទន់ភ្លន់ បន្ទាប់​មក​ខ្ញុំ​លើក​នាង​បីដូច​កាល​ថ្ងៃ​អាពាហ៍ពិពាហ៍​អីចឹង​។ ទម្ងន់​ខ្លួន​នាង​កាន់តែ​ស្រាល​ទៅៗ ធ្វើឲ្យ​ខ្ញុំ​ក្រៀមក្រំ​ណាស់​។​

​នៅ​ថ្ងៃ​ចុងក្រោយ នៅ​ពេល​ខ្ញុំ​លើក​បី​នាង ខ្ញុំ​ពិបាក​នឹង​ដើរ​ទៅ​មុខ​ជា​ខ្លាំង​។ ខ្ញុំ​កាន់​នាង​យ៉ាង​ណែន​រួច​និយាយថា «​បង​មិន​បាន​កត់សម្គាល់​ថា ជីវិត​របស់​យើង​ពិតជា​ខ្វះ​ភាពកក់ក្ដៅ និង​ភាព​ស្និត​ស្នាល​ខ្លាំងណាស់​»​។ ប្រពន្ធ​ប្រែ​ទឹកមុខ ភ្ញាក់ផ្អើល​បន្តិច​ពេល​បានឮ​សម្ដី​នេះ​។​

​បន្ទាប់មកទៀត ខ្ញុំ​បាន​បើករថយន្ត​ទៅ​កន្លែងធ្វើការ រួច​ដើរ​ចេញពី​រថយន្ត​យ៉ាង​លឿន ដើរ​សំដៅ​ទៅ​រក​មិត្តស្រី នាង ចេ​ន រួច​ប្រាប់ថា «​ចេ​ន ឲ្យ​បង​សុំទោស​! បង​ពិតជា​មិន​ចង់​លែងលះ​ប្រពន្ធ​បង​ទៀត​ទេ​»​។ នាង​បាន​ងាក​មក​មើល​ខ្ញុំ ទាំង​ភ្ញាក់ផ្អើល រួច​យក​ដៃ​ស្ទាប​ថ្ងាស​ខ្ញុំ រួច​សួរ​ថា «​តើ​បង​ក្ដៅខ្លួន​មែន​ទេ​? ពីមុន​បង​និយាយ​ជាមួយ​ខ្ញុំ​ដូចម្ដេច​?» ខ្ញុំ​ដក​ដៃ​នាង​ចេញពី​ថ្ងាស​ភ្លាម​។​

«​សុំទោស ចេ​ន បង​នឹងមិន​លែងប្រពន្ធ​ទេ​។ ជីវិត​អាពាហ៍ពិពាហ៍​របស់​យើង​ហាក់​រកាំរកូស​បន្តិច​ពីព្រោះ​បង និង​ប្រពន្ធ មិនសូវ​បាន​នៅ​ជាមួយគ្នា ដើរលេង​លំហែ​ជាមួយគ្នា មិនមែន​ពួកយើង​មិន​ស្រលាញ់​គ្នា​ទេ​។ ឥឡូវ​ខ្ញុំ​ចាប់ផ្ដើម​យល់​ពី​គុណ​តម្លៃ ចាប់​តាំងពី​ខ្ញុំ​បី​នាង​ដូច​កាល​យើង​រៀបការ​ជាមួយ​គ្នា ហើយ​ខ្ញុំ​សម្រេចចិត្ត​ចុងក្រោយ​ថា នឹង​រួមរស់​ជាមួយ​ប្រពន្ធ​ម្នាក់​នេះ​រហូត​អស់​មួយជីវិត​»​។​

​នាង ចេ​ន ហាក់​ភ្ញាក់​ព្រើត​ដូច​ក្រោក​ពី​គេង​។ នាង​ស្រែក​គំហក​ដាក់​ខ្ញុំ រួច​ទាត់​ទ្វារ​គ្រាំងៗ ទៅសម្ងំ​យំ​ម្នាក់ឯង​។ ខ្ញុំ​បាន​ចុះមក​ក្រោម​យ៉ាង​ប្រញាប់ ហើយ​បើករថយន្ត​ទៅ​ហាង​មួយ ទិញ​ផ្កា​មួយ​បាច់​សម្រាប់​ប្រពន្ធ​ខ្ញុំ​។ អ្នកលក់​សួរ​ខ្ញុំ​ថា ក្នុង​កាត​សម្រាប់​ដាក់​លើ​ផ្កា ចង់​សរសេរ​យ៉ាងម៉េច​? ខ្ញុំ​ប្រាប់​ឲ្យ​ដាក់ថា «​បង​នឹង​បី​អូន​រៀងរាល់​ព្រឹក រហូត​ពួកយើង​អស់​ជីវិត​»​។​

​នៅ​ល្ងាច​ដដែល​នោះ ខ្ញុំ​បាន​មក​ផ្ទះ កាន់​បាច់ផ្កា​ក្នុង​ដៃ​ទាំង​ទឹកមុខ​ញញឹម​ស្ទើរ​បិទមាត់​មិន​ជិត​។ ខ្ញុំ​បាន​ឡើង​ទៅ​ជាន់​លើ​មើល​បន្ទប់​គេង​ប្រពន្ធ ស្រាប់តែ​ឃើញ​នាង​គេង​លើ​គ្រែ​មិន​កម្រើក​សោះ ខ្ញុំ​ក៏​យកដៃ​អង្រួន​រាងកាយ​នាង ហើយ​និយាយ​ថា «​ប្រពន្ធ​សម្លាញ់​បង​មក​ដល់​ហើយ អូន​ក្រោក​ឡើង អូន​គេង​អី​ពេល​ហ្នឹង​»? ឃើញ​សភាព​ស្លេកស្លាំង ខ្ញុំ​ក៏​ស្ទាប​ដង្ហើម​ទើប​ដឹងថា​.. នាង​បាន​ស្លាប់​បាត់​ហើយ​។ ខ្ញុំ​រន្ធត់ចិត្ត ខ្ញុំ​យំៗ​ទាំង​ក្ដុកក្ដួល​ខ្លាំងណាស់​។​

​ភរិយា​របស់​ខ្ញុំ​បាន​កើត​ជំងឺមហារីក​ជាច្រើន​ខែ​មក​ហើយ ខ្ញុំ​ក៏​មិនសូវ​បាន​មើលថែ​នាង រវល់​តែ​ឈ្លក់​វង្វេង​នឹង ចេ​ន​។ នាង​ដឹងថា ខ្លួនឯង​នឹង​លាចាក​លោក​ឆាប់ៗ នាង​បាន​ព្យាយាម​ធ្វើ​យ៉ាងណា​កុំ​ឲ្យ​ភា​ពបែកបាក់​ចែកផ្លូវ​នេះ ប៉ះពាល់​ដល់​សតិអារម្មណ៍​កូនប្រុស​។ ចុងបញ្ចប់ ខ្ញុំ​នៅ​សល់​តែ​វិប្បដិសារី​គួរឲ្យ​ឈឺចាប់​បំផុត​ក្នុង​ជីវិត​មួយនេះ បើ​ពេល​វេលា​អាច​ដើរ​ថយក្រោយ​បាន ខ្ញុំ​នឹង​ធ្វើ​រឿង​ល្អៗ​ចំពោះ​ប្រពន្ធ​កូន​របស់​ខ្ញុំ​ជា​រៀងរហូត​៕

តម្លៃ​អប់រំ​រឿង​៖ សេចក្ដីសុខ​សុភមង្គល​ក្នុង​គ្រួសារ​មួយ​មិនមែន​ជា​លុយ ឡាន វីឡា​តែ​ប៉ុណ្ណឹង​ទេ គឺ​ភាព​កក់ក្ដៅ និង​ភាពស្និទ្ធស្នាល​ផ្ដល់​ឲ្យ​គ្នា​។ របស់​ដ៏​មាន​ឥទ្ធិពល​លុយ​ឡាន មិន​អាច​ទិញ​សុភមង្គល​បានទេ សូម​ចំណាយ​ពេលវេលា​ខ្លះ បាន​នៅ​ជាមួយ​ប្រពន្ធ​កូន​ឲ្យបាន​ច្រើន​តាម​ដែល​អាច​ធ្វើបាន​។ ពេលវេលា​មនុស្ស​ស្រី​ចូលចិត្ត​ជាង​គេ​សម្រាប់​គ្រួសារ គឺ​ញ៉ាំ​អាហារ និង​ដើរ​លំហែរ​ជុំគ្នា​៕ (ផ្ដល់សិទ្ធិដោយ៖ Loykob.com)

ហាមលួចចម្លងអត្ថបទ​ពីវេបសាយ Morningfresh.news ដោយគ្មានការអនុញ្ញាត
error: ហាម​លួចចម្លង​អត្ថបទ​នេះ!